Świyntego Marcina a na dworcu autobusowym sie schodzi spora grupa ludzi. Z torbami, walizkami, z gitarami… Cosi sie szykuje!
Jasne, Heczki nóm zaś zorganizowali wycieczke! Zaroz przed autobusym my dostali po półce Januszowej śliwowice, Basinego cukecioka na zagryche i wizytówke. Na tej była kura albo prosioczek, jakisi numera, jeszcze ku tymu każde inszego koloru. A ku tymu my se jeszcze wylosowali nalepke półki z dalszym numerym, kieróm my se musieli nalepić na tóm wizytówke z drugij stróny.
I już sie jechało! Ale jyny chwilke. Piyrszo zastawka była na Harcowie u Pyszków w jejich prywatnej bimbrowni! Byli fest przygotowani, dali nóm skosztować wszeckigo, co polóm a Adam nóm pokozoł jako sie tako dobro gorzołka robi. Jeszcze roz dziynki Pyszcy!
Pieknie my podziynkowali i jechało sie dali. Teraz aż do Vizovic. W autobusie panowała dyscyplina, czynstowało sie podle numerków na półkach, tak żodyn nie przedbiygoł. We Vizovicach my mieli wolne, tak my se pojedli albo dali jyny piwko a kawke. A już my jechali do pana Jelinka. Tam my sie podle barwy numerek rozdzielili zaś na dwie grupy i pokozali nóm, jako sie ta śliwowica robi profesjonalnie a we wielkim. Dali nóm aji skosztować…
A potym my już jechali do Roštína w Chřibach aby my se pomieszkali w penzionie Bunč. Było tam fajnie, dali nóm pojeść, posiedzieć my mógli przi ogniu na terasie albo w jadalni, nagotowali nóm aji raut. Pojedli my, cosi mało popili, pośpiywali… fajnie było! I szło sie spać.
Rano śniadanko, wspólno fotka i jadymy dali. Teraz nas szofer Bogdan Ćmiel zawióz do Luhačovic. Tam nas panie przewodniczki pokludziły po tych lazniach, i choć Luhačovice wiynkszość z nas zno, dowiedzieli my sie kupa nowego. Aji to, że tam majóm swój piwowar! Tak my sie też tam zaszli podziwać. Tam nóm nagotowali obiadek i ukozali, jako sie w takim małym piwowarku warzi to piwo. A warzóm tam ganc dobrze. Aji piwo aji obiod był wyborny!
Ale to już sie uzbiyrało godzin i trzeba było jechać do dómku. W autobusie jeszcze wszecy chcieli doczynstować zbytki, tak było wesoło.
Wycieczka była chyba udano, a jak bedzie zainteresowani, to Wóm Heczki możne zaś na rok cosi wymyślóm!