Autobus cichutko warczy, bo se pan Hławiczka kupił szumny, skoro nowy, a my w takt piyrszej półki w autobusie jadymy na wycieczke. Tym razym w Zakopane…
Pogoda sie jako-tako dzierży, słoneczko nóm nie doskwiero, ale ani deszcz nie dokuczo a droga fajnie ucieko. Już o 11 my sóm na miejscu.
Tu my sie rozdzielili, bo Ci młodsi chcieli iść na ture, baby na torg, chłopi na skocznie… Już w autobusie my sie domówili kaj a o kierej sie zyndymy, tak se wycieczki każdy używoł, jako chcioł!
Jo szeł z chłopami na skocznie a potym szpacyrkym na Krupówki cosi poswaczyć i dać se piwko. Nasze babki już na nas czakały aji z nakupami.
Piyrsze spotkani my mieli na cmentarzyku na Pęksowym Bzyzku. Malutki kierchówek, ale co grób to dzieło sztuki i kupa znómych osobistości tam miało swój grób… Tóż my poszpacyrowali, kapke spoczli i szli na drugóm zastawke.
To było na kolejke na Gubałówke. Wyjechali my na wrch, pumalutku my se przeszli na Butorowy Wierch a tam zaś lanówkom na dół… Tam po nas przijechoł autobus, aby nas odwióz mieszkać. Po chodniku my zebrali tych, co sie z tury wrócili i pojechali my do chaty.
A mieszkani my mieli fajne, bo tam miyszko koleżanka od Kulków, Misia Topór-Orawiec, i u ni my mieli domówione jedzyni i spani. Ze szwigermamóm nóm nawarziły, tak my powieczerzali i potym na chwile siedli sie pobawić.
A Misia nagotowala zabawe na 102!!! Było pogoszczyni, była kapela ludowa (kierej my to kapke mylili), zaśpiywały nóm cerki od Misi (tak aji kultura była) a Marian zebroł kapke muzyki, tak gdo chcioł aji potańcowol!!! No używali my aż do rana a było mooooc fajnie!!!
Rano pobudka, śniodani i autobus nas zawióz na Wierch Poroniec a stąd my se szli na Rusinowóm Polane na bacówke.
Pogoda była super, pooglóndali my aji kapke ty Polski Tatry a baca nóm powykłodoł, jako to tam pasóm a wyganiajóm owce a robióm wszecki ty wyrobki. Aji my se nakupili bryndze a syrów, żinczice sie napili… I jechali my na dół.
Po drodze my sie wstawili w karczmie Zadyma na obiod (jedli my z koryta, ale nie było to złe…), a że tam majóm aji browarek, tóż my go pooglóndali i piwa skosztowali…
Jeszcze fotka wszeckich przed gospodóm i wio do dómu!!!
Myślim, że wycieczka była „zaś“ fajno i że jak dożyjymy, to na rok zaś pojadymy!!!
JHG
No, bedzie trzeba sie podziwać po inszy destynacyji, bo wybory żech nie wygroł i z Medżugorii nic nie bedzie 🙂
Chcym tu jeszcze roz podziynkować wszeckim, co w jakikolwiek sposób byli włónczóni do organizacji!!! wszeckim co jechali !! a na kóniec aj Staśkowi za to że nas bezpieczie i z takim szumnym autobusym powoził !